Le Cente 

Cuanche si viôt pe prime volte la Cente di Vuanis si reste starlupîts come se si fasès un salt indaûr di tancj secui dome tal cjalâ chestis costruzions une vore vielis. Edificis sempliçs ma cun cualchi scherz decoratîf preseât come lis suasis a dincj e i arcs in cuet che cuasi ricamin lis gornis e lis voltis di tiarecuete e che ur dan rispiet e distinzion. "La cjase dal curât" secont che si dîs, vuê je purtrop cuasi sdrumade. Forsit lì al ere a stâ il muini. Chest titul pai nestris vons al ere une vore preseât e al vignive dât par elezion di chei oms che comandavin la famee, in tune adune clamade "vicinia". Il muini al veve ancje altris responsabilitâts come che di tornâ indaûr i bêçs dai malapiês o da robariis in glesie e vie indenant…e alore al scugnive sei a sta dongje de glesie par tignîle aments di dì e di gnot. Lì dongje je ancjemò in pîts la "canepe" cun il "sollaro" ven a stâi la cantine e il teson lì che i vielis cameraris de glesie e des confraternitis, e dal cumun, metevin adun lis blavis e lis robis di mangjà che i colonos davin pes decimis. Chest edifici cuasi unic tal so gjenar, al à un puartin di cinc arcadis in cuet, trê devant e dôs in bande, la cantine, lì che su la taja metevin lis botis dal vin e il vuelin di ulîf pe "luminarie", vuelin che si cjapave su par fâ lûs in glesie ( glesie che secont bons. Guglielm Biasutti vignive inluminade par fûr ancje di gnot) e al plan di sore un toglât. Par là sù si doveve passâ par une buse. Ancje a chi la adune architetoniche a je semplice, ma ancjemò a fâs viodi une lûs di fuarce che a tire l’interès di chel che si ferme a cjalâ. In timps plui dongje an dan viert trê barcons su la fassade devant e trê par daûr e an dan stropât i barcons de vecje costruzion, gambiament che andà fat plui mâl che ben a la bielece dal edifici. Tal vieli cimiteri (santìc) podìn viodi ce ca reste de vecje glesie di Sante Gnese, che d’in prin jere capele e daspò vicariâl. Lis vecjis Centis erin il cûr de vile e cuasi tignivin cont la glesie che ere tal mieç, il cimiteri ator ator, e lis cjasis plui vecjis. Dut ator si jevave il mûr e di chi cjapavin il non "Centa". Si pense che chest lûc si clami Cente parcè che il cimiteri al veve la muraie ator ator, ma indalore ducj i cimiteris dovaressin clamâsi cente, parcè che si doveve fâ sù par leç il mûr ator ator, come che si doveve fâ , denant su la puarte, une buse cuntune rêt disore di mût che lis bestiis no lassin a mangjâ la jerbe tal cimiteri. Ogni volte che si d'are vegnin sù dai cjamps lì ator fruçons di tiarecuete e tocs di cops come chei che une voltone si doprave par fâ i cuvierts des cjasis, e fruçons di ceramichis che podin judâ a dâ une éte a la glesie restade.

Burît fur di " La villa di Ioannis " Augusto Geat 1975

Santa Lussia dal bon cûr al voli dentri 'l sporchet fûr.

La Zenta

Galerie fotografiche

Fotos di Riccardo Avian